पत्र मित्र सोबती नसे तो

गुलजार यांच्या वर्तमानपत्राबद्दलच्या मूळ हिंदी कवितेचे हे स्वैर मराठी भाषांतर

डॉ शंतनु अभ्यंकर, वाई

पत्र-मित्र सोबती नसे तो; 

चहा सकाळी सपक लागतो;

उजाडतेही अर्धेमुर्धे, 

डोळा अर्धा-अर्धा मिटतो.

खमंग वार्ता कुरकुरीतशी;

बुचकळ्याला चहात नाही;

नवा कायदा, नवीन फतवा; 

चघळण्यासही काही नाही.

पत्र-मित्र मम कुशीत येऊन; 

दो हाती दे जग सामावून;  

त्या पानांची फडफड फडफड;  

गरुडभरारी, दुनिया दर्शन.

असेल कोठे इथे-तिथे ते;

पदवीचे पोकळ भेंडोळे;

पण फोटोचे  पिवळे कात्रण;

जुने, फाटके, परि जपलेले. 

होत राहावी भेट रोजची;

पेपर नाही, ही तर खिडकी;

वर्तमान माझेच मला अन्;

खबरबात साऱ्या देशाची.

बिनपेपरचा उदासवाणा;

दिवस भासतो दीन, रिकामा;

बिनपेपरची उदासवाणी;

तहानलेली राही तृष्णा.

डॉ शंतनु अभ्यंकर,  वाई.